— राजेश निर्माणी
मिति : २०८२ माघ ७ गते
नेपाली कम्युनिस्ट आन्दोलनको इतिहासमा जनतासँग जोडिएर निरन्तर संघर्ष गर्दै आएका नेताहरूको पंक्तिमा रामकुमार भट्टराई एक स्थापित नाम हुन्। विचारमा दृढ, व्यवहारमा सरल र कार्यमा परिणाममुखी भट्टराई संविधानसभा सदस्य तथा पूर्व सांसदका रूपमा राष्ट्रिय राजनीतिमा आफ्नो भूमिका प्रमाणित गरिसक्नुभएको छ। उहाँको राजनीतिक यात्रा पद, प्रतिष्ठा वा सुविधाभन्दा पनि जनताको हक, अधिकार र सम्मानका लागि समर्पित रहँदै आएको देखिन्छ।
रौतहट निर्वाचन क्षेत्र नम्बर–४ का जनसमस्या, आवश्यकता र सम्भावनालाई नजिकबाट बुझेका भट्टराईले विगतमा सांसद पदमा रहँदा “एक वडा–एक सडक र एक पुल” कार्यक्रम सञ्चालन गरी विकासलाई व्यवहारमा उतार्नुभएको थियो। दशकौँदेखि उपेक्षित वडाहरूमा सडक र पुल निर्माणको काम अगाडि बढ्नु, जनताको दैनिक जीवन सहज बन्नु र भौगोलिक अलगाव घट्नु उहाँको नेतृत्वका ठोस उपलब्धिहरू मानिन्छन्। उक्त अभियानअन्तर्गत सुरु भए पनि बाँकी रहेका विकासका कामहरू पूरा गर्नु उहाँको प्रमुख प्रतिबद्धतामध्ये एक हो।
शिक्षा, स्वास्थ्य, कृषि, रोजगारी र पूर्वाधार विकासलाई उहाँले सधैँ प्राथमिकतामा राख्दै आउनुभएको छ। जनताका छोराछोरीले गुणस्तरीय शिक्षा पाउनुपर्छ, नागरिकले उपचारका लागि अनावश्यक दुःख भोग्नुपर्दैन, र युवाले आफ्नै गाउँ–ठाउँमा सम्मानजनक रोजगारी पाउनुपर्छ भन्ने स्पष्ट दृष्टिकोण उहाँको राजनीतिक सोचको मूल आधार हो। यसका साथै किसानमुखी नीति, आधुनिक कृषि प्रविधिको प्रयोग र उत्पादन वृद्धि मार्फत आत्मनिर्भर अर्थतन्त्र निर्माणमा उहाँको विशेष जोड रहँदै आएको छ।
रामकुमार भट्टराई भ्रष्टाचारविरुद्ध स्पष्ट र कठोर धारणा राख्ने नेता मानिनुहुन्छ। नयाँ पुस्ता (जेन्जी) आन्दोलनको मर्मलाई आत्मसात गर्दै देशबाट भ्रष्टाचारको विदाई गरी सुशासन कायम गर्नु आजको अनिवार्य आवश्यकता हो भन्ने उहाँको विश्वास छ। संविधानको रक्षा, लोकतान्त्रिक मूल्य–मान्यताको संरक्षण र राज्य संयन्त्रलाई जनमुखी बनाउने सवालमा उहाँ सम्झौताविहीन अडानका साथ अघि बढ्दै आउनुभएको छ।
यही राजनीतिक दृष्टिकोण, अनुभव र जनताप्रतिको उत्तरदायित्वका साथ रामकुमार भट्टराई हाल नेपाली कम्युनिस्ट पार्टी (चुनाव चिन्ह–तारा) का तर्फबाट रौतहट निर्वाचन क्षेत्र नम्बर–४ बाट सांसद पदको उम्मेदवारका रूपमा चुनावी मैदानमा उत्रिनुभएको छ। आज रौतहट–४ ले भाषणभन्दा काम गर्ने, नाराभन्दा परिणाम दिने र पदभन्दा जनताको भरोसालाई प्राथमिकता दिने नेतृत्वको खोजी गरिरहेको छ। त्यस अर्थमा अनुभव, इमानदारी र विकासको स्पष्ट खाका भएका रामकुमार भट्टराई एक सक्षम, भरोसायोग्य र जनउत्तरदायी विकल्पका रूपमा प्रस्तुत भएका छन्।
संविधानको रक्षा, सुशासनको स्थापना र रौतहट–४ को समुन्नत भविष्यका लागि सचेत नागरिकको विवेकपूर्ण निर्णय आवश्यक रहेको आजको सन्दर्भमा, विकास र स्थायित्वको यात्रालाई निरन्तरता दिन उहाँप्रतिको जनविश्वास निर्णायक बन्ने देखिन्छ।
