रौतहट/ वृन्दावन नगरपालिका–९ भुसहामा सोमबार राति भएको एक क्रूर र संवेदनशील घटना सार्वजनिक भएको छ। भुसाहा निवासी शेख आदिलकी २५ वर्षीया पत्नी तरीमा खातुनलाई हत्या गरी घरभित्रै खनिएको खाडलमा गाडिएको अवस्थामा प्रहरीले मंगलबार फेला पारेको छ।
श्रीमान् साउदी अरबमा श्रम गर्न बसेका बेला घरमै यस्तो अमानवीय घटना घटेकाले स्थानीय बासिन्दा स्तब्ध बनेका छन्। घटनापछि मृतकका ससुरा शेख अलि मोहम्मदसहित परिवारका सबै सदस्य फरार रहेको जिल्ला प्रहरीले जनाएको छ। उनीहरू डेढ वर्षका बालक मोहम्मद आरिफलाई समेत लिएर बेपत्ता भएको जानकारी प्रहरीले दिएको छ।
प्रहरीका अनुसार शव उत्खननपछि प्रारम्भिक अनुसन्धान तीव्र पारिएको छ। घरभित्र नै खाडल खनी शव गाडिएको तथ्य उजागर भएपछि सुरक्षामाथिको प्रश्न र समुदायको आक्रोश झनै बढेको छ।
स्थानीयवासीले घटनाका दोषी जसुकै भए पनि छिटो पहिचान गरी कानूनी प्रक्रिया अघि बढाउन माग गरेका छन्। जिल्ला प्रहरीले फरार परिवारजनको खोजी र आवश्यक अनुसन्धानलाई तीव्र बनाइरहेको जनाएको छ।
